Оршил 
НҮБ-ын Хүүхдийн эрхийн тухай конвенци, Монгол Улсын Боловсролын тухай хууль, Хүүхдийн эрхийн тухай, Хүүхэд хамгааллын тухай, Гэр бүлийн хүчирхийлэлтэй тэмцэх тухай, Хөгжлийн бэрхшээлтэй хүний эрхийн тухай хуулиудад хүүхэд бүр гэр бүл, сургууль, нийгмийн бүхий л орчинд аливаа хүчирхийллээс хамгааллуулах эрхтэй бөгөөд насанд хүртлээ эцэг эх, гэр бүл болон төрийн онцгой халамж, хамгаалалтанд байх шаардлагатай болохыг заасан. Ерөнхий боловсролын сургуулийн орчинд суралцагчийн аюулгүй байдлыг хангах, суралцагчийг аливаа хүчирхийлэл, дарамт, дээрэлхэлт, бие махбодийн шийтгэл, гэмт хэрэг, хорт зуршлаас сэргийлэх нөхцөлийг бүрдүүлэх шаардлагыг үндэслэн Монгол Улсын Боловсрол, соёл, шинжлэх ухаан, спортын  сайдын 2018 оны 7 дугаар сарын 31-ны А/476 тоот тушаалаар Ерөнхий боловсролын сургуулийн орчин дахь Хүүхэд хамгааллын бодлого  батлагдсан. ЕБС-ийн ХХБ нь үндэслэл, зорилго, зорилт, баримтлах зарчим, хамрах хүрээ, үйл ажиллагааны чиглэл, удирдлага, зохион байгуулалт, хяналт үнэлгээ, хүрэх үр дүн гэсэн нийт есөн бүлэг бүхий баримт бичиг юм.